Երևանի ժամանակով կիրակի վաղ առավոտյան իր հերթական մենամարտն անցկացրեց երկրորդ թեթևագույն քաշային կարգում WBC և WBA վարկածներով աշխարհի չեմպիոն ՎԱԽԹԱՆԳ ԴԱՐՉԻՆՅԱՆԸ: Նրա մրցակիցը WBC վարկածով աշխարհի ժամանակավոր չեմպիոն, 29-ամյա մեքսիկացի Թոմաս Ռոխասն էր: Նախորդ մարտում Ջոզեֆ Ագբեկոյից կրած ցավալի պարտությունից հետո Վախթանգը լի էր սասանված հեղինակությունը վերականգնելու վճռականությամբ:
Այս մենամարտից առաջ կայացած մամուլի ասուլիսում մեքսիկացին հայտարարել էր, որ պատրաստ է շաբաթօրյա մարտին, և շաբաթը լինելու է «երկուսը մեկի համար», քանի որ ինքը Վիկից խլելու է չեմպիոնական երկու գոտիները: «Նա լավ բռնցքամարտիկ է, բայց ես պատրաստ եմ նրա հետ մենամարտին: Սա շատ կարևոր մարտ է ինձ համար: Վախթանգ Դարչինյանն ուժեղ է, բայց անհաղթելի չէ: Ես պատրաստ եմ տիտղոսը նվաճելուն: Ես մեծաքանակ հարվածներ կհասցնեմ, կհարվածեմ ավելի շատ և ուժեղ: Դարչինյանը հանդիպել է շատ լավ բռնցքամարտիկների հետ, բայց ինձ նմանների հետ նա դեռ չի մենամարտել: ՈՒրախ եմ ԱՄՆ վերադառնալուս համար, բայց այս մարտը ես նվիրում եմ իմ հարազատ մեքսիկական Վերակրուս քաղաքին»,- մարտից առաջ ասել է Թոմաս Ռոխասը:
Իր հերթին աշխարհի չեմպիոնը վստահություն է հայտնել իր ուժերի նկատմամբ և ասել, որ իրեն կհաջողվի պահպանել չեմպիոնական գոտիները: «Ռոխասի թիմը կարող է հավատալ ամեն ինչի: Նրանք ասում են, որ պատրաստվում են ինձ նոկաուտի ենթարկել և խլել իմ բոլոր տիտղոսնե՞րը: Ինչպե՞ս կարող էր նրա մտքով նման բան անցնել, երբ ես հաղթել եմ բոլոր նրանց, ում հետ նա ժամանակին հանդիպել է: Նա իրեն խիզախորեն է պահում, բայց երբ տեսնի ինձ, նրա ծնկները կդողան: Ես, լիցքավորած հրացանի նման, պատրաստ եմ «գնդակահարելու» նրան բռնցքամարտիկի իմ ունակություններով»,- մարտից առաջ հայտարարել է Վախթանգը:
Մենամարտը կայացավ Կալիֆոռնիա նահանգի Ռանչո Միրեջ քաղաքի «Ագուա Կալիենտե» դահլիճում: Առաջին ռաունդը սկսվեց հետախուզությամբ: Գրեթե ողջ ռաունդն անցավ մոտավորապես հավասար պայքարում: Միայն վերջին 15-20 վայրկյանում Վիկն ակտիվացավ և ձախ ձեռքով մի քանի ուժգին հարված հասցրեց նպատակին: Սակայն, ինչպես պարզվեց մենամարտի ավարտից հետո, առաջին ռաունդում հարվածներով առավելությունը մեքսիկացու կողմն էր:
Երկրորդ ռաունդի մեծ մասը ևս անցավ փոխնիփոխ գրոհներով, մի պահ նույնիսկ Վախթանգը հայտնվեց բարդ վիճակում, սակայն կարողացավ դուրս պրծնել ճոպանների մոտից և շարունակեց գրոհել: Թվում էր, թե ռաունդը կավարտվի, և մրցակիցները կգնան ընդմիջման, սակայն երբ ռաունդի ավարտին մնում էր 14 վայրկյան, Վախթանգը ձախ ձեռքի ուժգին հարվածով «գնդակահարեց» մեքսիկացու ծնոտը, և Ռոխասը տապալվեց ռինգի հատակին: Մրցավարը հաշիվ բացեց և երկու ձախլիկների մենամարտում արձանագրեց նոկաուտ: Սա 33-ամյա Վիկի 33-րդ հաղթանակն էր պրոֆեսիոնալ ռինգում, որոնցից 27-ը նա տարել է նոկաուտով:
«Նա ավելի շատ հարվածներ էր հասցնում և միավորներով առջևում էր, բայց ես գիտեի, որ իմ ժամանակը գալու է,- մարտից հետո հայտարարել է հայ բռնցքամարտիկը:- Ես պարզապես սպասում էի և օգտագործեցի իմ ունակությունները. կարևորը գլուխն է և ոչ թե ուժը: Հոգեբանական առումով ես շատ լավ էի նախապատրաստվել»:
WBA վարկածով աշխարհի ժամանակավոր չեմպիոն Նոնիտո Դոները հայտարարել է WBC և WBA վարկածներով աշխարհի լիարժեք չեմպիոն Վախթանգ Դարչինյանի հետ կրկին հանդիպելու ցանկության մասին: Հիշեցնենք, որ նրանց առաջին մենամարտում Դոները հաղթել էր: «Հուսով եմ, որ նա բավականին քաջություն ունի ինձ հետ կրկին ռինգ դուրս գալու համար: Նա չի հոգնում ինձ մենամարտի հրավիրելուց: Եթե այդ մարտը հնարավոր լինի կազմակերպել, շատ լավ կլինի: Ես պատրաստ եմ այդ մարտին և ուրախ կլինեի, եթե այն կայանար»,- հայտարարել է Դոները: Դե ինչ, սպասենք Վախթանգի և նրա մենամարտերի կազմակերպիչ Գերի Շոուի արձագանքին:
Արտաշես ԹԱԴԵՎՈՍՅԱՆ

Հոկտեմբերի 17-ին Բեռլինում և Նոթինգհեմում մեկնարկեց պրոֆեսիոնալ բռնցքամարտի` նախադեպը չունեցող մի մրցաշար, որը կոչվում է «Super Six World Boxing Classic»: Այն տևելու է մինչև 2011 թվականը: Մասնակցում են երկրորդ միջին քաշային կարգի վեց ուժեղագույն բռնցքամարտիկներ` Արթուր Աբրահամը, Ջերմեն Թեյլորը, Միքել Քեսլերը, Անդրե ՈՒորդը, Կառլ Ֆրոչը և Անդրե Դիրելը: Մրցակիցները մեկական անգամ հանդիպելու են միմյանց հետ, չորս լավագույնները դուրս են գալու կիսաեզրափակիչ, որի երկու հաղթողները վիճարկելու են բացարձակ չեմպիոնի կոչումը:
Արթուր Աբրահամն այս մրցաշարից առաջ հրաժարվել է իր չեմպիոնական գոտուց` փոխելով քաշային կարգը: Նա նշում է, որ այսպես ավելի հեշտ կլինի նախապատրաստվել մենամարտերին, քանի որ 8 կգ նիհարելու անհրաժեշտություն չի լինի:
Բեռլինի 12-հազարանոց լեփ-լեցուն «Օ2 World» դահլիճը «Սքորփիոնզ» հռչակավոր ռոք-խմբի կենդանի նվագի ուղեկցությամբ ողջունեց «Արքա» Արթուր Աբրահամին, որի հագին արքայական ինքնատիպ թիկնոց էր: Նրա մրցակիցն այդ քաշային կարգում աշխարհի նախկին բացարձակ չեմպիոն, ամերիկացի Ջերմեն Թեյլորն էր: Մինչ այս մենամարտը Արթուրն անցկացրել էր 30 մարտ, տարել նույնքան հաղթանակ, որոնցից 24-ը` նոկաուտով: Մարտից առաջ ամերիկացին հայտարարել էր. «Ես անհամբերությամբ եմ սպասում առաջիկա մենամարտին: Արթուրը համառորեն է նախապատրաստվել մարտին, բայց ես նախապատրաստվում եմ ավելի համառորեն: Ես ավելի լավ բռնցքամարտիկ եմ, քան նա, հետևաբար ինձ չի մտահոգում, որ հանդես եմ գալու նրա հարկի տակ և նրա հանդիսականների առջև: Ես կթելադրեմ իմ պայմանները յուրաքանչյուր ռաունդում: Աբրահամը ֆիզիկապես ուժեղ բռնցքամարտիկ է, բայց նրա մեջ չկա ոչ մի առանձնահատուկ բան: Նա գործում է շատ կանխատեսելի և միանման, բայց ուժի և դիմացկունության շնորհիվ առավելության է հասնում: Ես նրան չէի դնի իմ նախկին մրցակիցների հետ նույն շարքում»:
Իր հերթին Աբրահամը նշել էր. «Թեյլորը կարող է ասել, ինչ ցանկանում է: Վստահ եմ, որ հենց սկսեմ ծեծել նրան, նա անմիջապես կփոխի իր կարծիքն իմ մասին»:
Մարտը սկսվեց հետախուզությամբ: Արթուրը չդավաճանեց իր մշտական մարտավարությանը: Ինչպես միշտ, առաջին ռաունդներում նա առանձնապես ակտիվ չէ, ուսումնասիրում է մրցակցի ոճը` ժամանակ առ ժամանակ ստուգելով նրա ամրությունը: Արթուրը զգալի առավելություն ուներ 3-րդ, 4-րդ, 5-րդ ռաունդներում: 6-րդում սևամորթ ամերիկացին հարվածեց գոտկատեղից ներքև, և քանի որ դա արդեն երրորդն էր այդ մարտում, մրցավարը զգուշացրեց նրան և մեկ միավոր հանեց: Սկսած 7-րդ ռաունդից` հայ մարզիկն անցավ վճռական գործողությունների` մեծացնելով իր առավելությունը: Նրա բազմաթիվ հարվածներ հասնում էին նպատակին: 9-րդ ռաունդի սկզբին Արթուրն ուժգին հարվածով կարող էր ավարտել մարտը, սակայն Թեյլորը դիմացավ, մի քանի անգամ բռնեց Արթուրի ձեռքերը` մարելով նրա գրոհների թափը: Այս ռաունդից հետո Արթուրն առաջին անգամ ժպտաց: Եվս մեկ ուժգին հարված ամերիկացին ստացավ 10-րդ ռաունդի վերջում, սակայն կրկին մնաց ոտքի վրա: Բայց զգացվում էր, որ նա արդեն «լողում է»: 11-րդ ռաունդից հետո ամերիկացու դեմքն ամբողջովին այտուցված էր: 
Վերջին ռաունդն անցավ նույն սցենարով, ինչ նախորդ մի քանիսը. Արթուրն ուներ բացահայտ առավելություն: Նրա մի քանի ուժգին հարվածներ ցնցեցին Թեյլորին, սակայն նա կրկին մնաց ոտքի վրա: Թվում էր, թե մարտն այդպես էլ կավարտվի, և ելքը կվճռեն կողային մրցավարները, թեպետ այդ դեպքում էլ Արթուրի հաղթանակը կասկած չէր հարուցում (ինչպես այնուհետև պարզվեց, 11-րդ ռաունդից հետո բոլոր երեք մրցավարների թերթիկներում հաշիվն Արթուրի օգտին էր` 105-103, 107-102 և 106-102): Սակայն տեղի ունեցավ անսպասելին. երբ մարտի ավարտին մնում էր 15 վայրկյան, Աբրահամի աջ ձեռքի ուղիղ ուժգին հարվածը Թեյլորի ձեռնոցների արանքով դիպավ նրա քթին, և ամերիկացին տապալվեց ռինգի հատակին: Նա մի քանի րոպե չէր կարողանում ոտքի կանգնել: Գեղեցիկ ու տպավորիչ հաղթանակ էր: Արթուրի մարզիչ ՈՒլի Վեգները մեկնաբանել է իր սանի ելույթը. «Արթուրն այսօր լավ մարտ անցկացրեց: Նա գիտեր, թե ինչ պետք է անի: Շատ խելացի մարտ էր: Թեյլորն ուժեղ մրցակից էր: Բայց մենք պարտավոր էինք հաղթել տան մրցամարտում: Մենք պարտք էինք մեր հանդիսականներին, նրանց աջակցությունը զարմանահրաշ էր»:
«Նա պարզապես զարմացրեց ինձ իր աջ հարվածով: Ես այն չտեսա: Նա շատ ուժեղ է խփում»,- մարտից հետո ասել է Թեյլորը, որին անմիջապես տեղափոխել են հիվանդանոց: Ինչպես հաղորդել են բժիշկները, նա Բեռլինի հիվանդանոցում կմնա մի քանի օր: Ըստ ամերիկացու ներկայացուցչի, նա ստացել է ուղեղի ցնցում, ինչպես նաև ունի հիշողության կարճատև կորուստ: Նա մի քանի անգամ հետաքրքրվել է, թե որ ռաունդում է նոկաուտի ենթարկվել: Բժիշկները ենթադրում են, որ ռինգի հատակին հարվածելուց հետո վնասվել է նրա գլխի հետևի մասը: Արթուր Աբրահամն իր մրցակցին մաղթել է արագ ապաքինում. «Շատ ցավալի է լսել, որ նա հիվանդանոցում է: Ես ձգտում եմ հաղթել մրցակիցներիս, բայց երբեք չեմ ցանկանում նրանց վնասել: Առողջությունն ամենակարևոր բանն է, և հուսով եմ, որ Ջերմենը կապաքինվի: Ինձ համար պատիվ էր նրա հետ հանդիպելը»:
Նշվում է, որ Թեյլորը կարող է հրաժարվել հետագա մասնակցությունից վեցի մրցաշարում: Այդ դեպքում նրան կփոխարինի ամերիկացի Ալան Գրինը: Նույն օրը Մեծ Բրիտանիայում Կառլ Ֆրոչը միավորներով հաղթել է Անդրե Դիրելին, որի հետ էլ 2010 թ. հունվարի 23-ին ԱՄՆ-ում կհանդիպի Արթուր Աբրահամը: Այս պահին մրցաշարային աղյուսակը 3 միավորով գլխավորում է հայ բռնցքամարտիկը: Նշենք, որ նոկաուտով հաղթանակի համար տրվում է 3 միավոր, միավորներով հաղթանակի համար` 2, ոչ-ոքին գնահատվում է 1 միավոր, պարտությունը` 0:
Արտաշես ԹԱԴԵՎՈՍՅԱՆ

ՋԵՐՄՈՒԿԻ ՇԱԽՄԱՏԱՅԻՆ ՄՐՑԱՇԱՐՈՒՄ
Ջերմուկում ավարտվեց շախմատի «Մեծ մրցանակի» խաղարկության 5-րդ մրցաշարը, որից հետո վաղօրոք հայտնի դարձավ շարքի հաղթողը: Լևոն Արոնյանը, Բորիս Գելֆանդի հետ բաժանելով երկրորդ տեղը, անկախ վերջին մրցաշարի արդյունքներից, դարձավ անհասանելի իր մրցակիցների համար և նվաճեց աշխարհի չեմպիոնի կոչման հավակնորդների մրցաշարի երկու ուղեգրերից մեկը: Ջերմուկի մրցաշարի հաղթող դարձավ ուկրաինացի Վասիլի Իվանչուկը, որը միակն էր, ով ամբողջ մրցաշարի ընթացքում չկրեց ոչ մի պարտություն: Թեև հանուն ճշմարտության պետք է ասել, որ նա առնվազն երկու անգամ պարզապես հրաշքով փրկվեց պարտությունից:
11-րդ խաղափուլում միմյանց հետ մրցեցին մեր երկու գրոսմայստերները: Սևերով խաղացող Լևոն Արոնյանը մեծ առավելություն ստացավ Վլադիմիր Հակոբյանի նկատմամբ, սակայն վրիպեց և չկարողացավ իրացնել առավելությունը: Ոչ-ոքի ավարտվեցին նաև Բաքրո-Իվանչուկ, Կարյակին-Ալեքսեև, Գելֆանդ-Կամսկի և Կասիմջանով-Լեկո հանդիպումները: Ինարկիևը սևերով հաղթեց Յակովենկոյին, Էլյանովը սպիտակներով` Չեպարինովին:
Նախավերջին տուրում մեր գրոսմայստերները սևերով խաղաղ դաշն կնքեցին` Արոնյանը` Լեկոյի, Հակոբյանը` Ինարկիևի հետ: Նույնպիսի ավարտ ունեցան նաև Չեպարինով-Կարյակին, Ալեքսեև-Բաքրո և Իվանչուկ-Յակովենկո պարտիաները: Կամսկին հաղթեց Էլյանովին, իսկ Գելֆանդը սևերով` Կասիմջանովին:
Վճռորոշ խաղափուլից առաջ մրցաշարային աղյուսակում երկիշխանություն էր` 7,5-ական միավոր ունեին Լեկոն և Իվանչուկը: Արոնյանն ու երեք շախմատիստ նրանցից հետ էին մնում կես միավորով: Բավականին արագ ոչ-ոքի ավարտվեցին Էլյանով-Կասիմջանով, Կարյակին-Կամսկի, Բաքրո-Չեպարինով և Յակովենկո-Ալեքսեև պարտիաները: Մնացին երեք զույգեր, որոնց հանդիպումներում էլ վճռվեց մրցաշարի մրցանակակիրների հարցը: Առաջինն իր պարտիան հաղթանակով ավարտեց Լևոն Արոնյանը: Նա գեղեցիկ ոճով առավելության հասավ Ինարկիևի նկատմամբ: Մեր հույսը Վլադիմիր Հակոբյանն էր: Եթե նա սպիտակներով կարողանար գոնե ոչ-ոքի ավարտել պարտիան Իվանչուկի հետ, ապա Արոնյանը կբաժաներ առաջին հորիզոնականը: Սակայն Հակոբյանը չդիմացավ ուկրաինացու ճնշմանը և երկարատև պայքարից հետո հանձնվեց: Արդեն պարզ էր, որ հաղթող է դառնալու Վասիլի Իվանչուկը, քանի որ Լեկոյի դիրքը Գելֆանդի հետ պարտիայում գրեթե անհուսալի էր: Իսրայելցի գրոսմայստերը, ի վերջո, հաղթեց Լեկոյին և միավորներով հավասարվեց Արոնյանին: Ի դեպ, Արոնյանն ու Գելֆանդը մրցաշարում տարան ամենաշատ հաղթանակները` 5-ական: Նրանք վաստակեցին 21250-ական եվրո: Իսկ հաղթողին կտրվի 30000 եվրոյի վճարագիր:
Այսպիսով պարզվեց, որ «Մեծ մրցանակի» ընդհանուր հաշվարկում Արոնյանը դարձավ անհասանելի նույնիսկ միավորներով ամենամոտ մրցակցի` Թեյմուր Ռաջաբովի համար: Լևոնն ունի 500 միավոր, իսկ ադրբեջանցին, նույնիսկ եթե դառնա վերջին մրցաշարի միանձնյա հաղթող, առավելագույնը կվաստակի 483 1/3 միավոր: Նշենք, որ հաշվի են առնվելու յուրաքանչյուրի խաղացած չորս մրցաշարերից լավագույն երեքի արդյունքները: Շնորհավորում ենք Լևոնին հերթական մեծ նվաճման առթիվ և մաղթում հաջողություններ արդեն աշխարհի չեմպիոնի կոչման համար պայքարում:
Ըստ նախնական հաշվարկների` այս մրցաշարում Լևոն Արոնյանն իր գործակիցն ավելացրել է ավելի քան 5 կետով, և այժմ այն հավասար է 2773-ի, որը երրորդն է աշխարհում: Ցավոք, չափազանց անհաջող էր Վլադիմիր Հակոբյանի ելույթը: Նա միակ մասնակիցն էր, որ չտոնեց ոչ մի հաղթանակ: Հակոբյանը վաստակեց 5250 եվրո:
Ահա մրցաշարային աղյուսակի ամփոփիչ տեսքը.
1.  Վ. Իվանչուկ 8,5
2-3. Լ. Արոնյան 8,0
2-3. Բ. Գելֆանդ 8,0
4-6. Ե. Ալեքսեև 7,5
4-6. Ռ. Կասիմջանով 7,5
4-6. Պ. Լեկո 7,5
7.   Ս. Կարյակին 7,0
8.   Պ. Էլյանով 6,5
9-10. Գ. Կամսկի 6,0
9-10. Է. Բաքրո 6,0
11-12. Դ. Յակովենկո 5,0
11-12. Վ. Հակոբյան 5,0
13.  Է. Ինարկիև 4,5
14.  Ի. Չեպարինով 4,0
Հաջորդ խոշոր մրցաշարը, որին պետք է մասնակցի Լևոն Արոնյանը, Բիլբաոյի (Իսպանիա) «Մեծ սաղավարտի» եզրափակիչն է (սեպտեմբերի 5-12), որտեղ նրա մրցակիցները կլինեն Ալեքսանդր Գրիշչուկը (Ռուսաստան), Սերգեյ Կարյակինը (ՈՒկրաինա) և Ալեքսեյ Շիրովը (Իսպանիա):
Արտաշես ԹԱԴԵՎՈՍՅԱՆ

ՋԵՐՄՈՒԿԻ ՇԱԽՄԱՏԱՅԻՆ ՄՐՑԱՇԱՐՈՒՄ
Շախմատի «Մեծ մրցանակի» խաղարկության Ջերմուկի մրցաշարի ավարտին մնացել է երեք խաղափուլ: Ծավալվել է բավական անզիջում պայքար, և միանգամից մի քանի շախմատիստ պայքարում են մրցանակային տեղերի համար:
Իններորդ խաղափուլն արդյունքների տեսանկյունից ութերորդի կրկնությունն էր. յոթ պարտիա խաղաղ ելք ունեցավ, և միայն մեկ պարտիա ավարտվեց կողմերից մեկի հաղթանակով: Մրցաշարի հայտնություն ուզբեկ Ռուստամ Կասիմջանովը գեղեցիկ հաղթանակ տարավ բուլղարացի Իվան Չեպարինովի նկատմամբ: Ամենայն հավանականությամբ, Կասիմջանովի խաղի վրա դրական է անդրադառնում աշխարհի չեմպիոն Վիշվանաթան Անանդի հետ համագործակցությունը (2008 թվականից նա հնդիկ շախմատիստի մարզիչներից մեկն է):
Լևոն Արոնյանը սևերով մրցում էր ֆրանսիացի Էթիեն Բաքրոյի հետ: Լևոնն «a» ուղղաձիգում ստացավ անցունակ զինվոր, սակայն պարզվեց, որ այն իրացնել հնարավոր չէ, և մրցակիցները քայլերի կրկնությամբ համաձայնեցին ոչ-ոքիի: Վլադիմիր Հակոբյանի և Դմիտրի Յակովենկոյի մրցավեճում սպիտակներով խաղացող ռուսաստանցին ուներ որոշակի առավելություն, սակայն չկարողացավ իրացնել, և խոր վերջնախաղում մրցակիցները խաղաղություն կնքեցին: Այս տուրում ոչ-ոքի ավարտվեցին նաև Կարյակին-Ինարկիև, Էլյանով-Իվանչուկ, Գելֆանդ-Ալեքսեև և Կամսկի-Լեկո պարտիաները:
Մեկօրյա հանգստից հետո երեկ կայացավ 10-րդ խաղափուլը: Խաղային օրը բավական արդյունավետ էր: Կրկին ուրախացրեց Լևոն Արոնյանը: Յակովենկոյի հետ պարտիայում նա տոնեց իր չորրորդ հաղթանակը: Սևերով խաղացող ռուսաստանցին 17-րդ քայլում սխալ թույլ տվեց, և Լևոնը, աստիճանաբար զարգացնելով առավելությունը, վերջնախաղում ստացավ երկու անցունակ զինվոր թագուհու թևում: Կատարելով 50-րդ քայլը` Յակովենկոն հանձնվեց: Վլադիմիր Հակոբյանը 47-րդ քայլին ստացել էր բացարձակ պարտված դրություն, սակայն սպիտակներով խաղացող Լեկոն երկու անգամ կոպտորեն վրիպեց, և մեր գրոսմայստերը, ունենալով մեկ նավակ պակաս, պարտիան հավերժական շախով ավարտեց ոչ-ոքի: Մյուս պարտիաներում Ալեքսեևը հաղթեց Էլյանովին, Գելֆանդը` Չեպարինովին: Իր առաջին հաղթանակը տոնեց Ինարկիևը. նա հաղթեց Բաքրոյին: Ոչ-ոքի ավարտվեցին Իվանչուկ-Կարյակին և Կամսկի-Կասիմջանով պարտիաները:
Վերջին երեք տուրերից առաջ մրցաշարային աղյուսակը 6,5-ական միավորով գլխավորում են Լեկոն, Իվանչուկը և Կասիմջանովը: Արոնյանն ու Ալեքսեևն ունեն 6-ական միավոր: Հակոբյանը 4 միավորով բաժանում է 10-12-րդ տեղերը:
Զվարճալի միջադեպ գրանցվեց 8-րդ տուրի Լեկո-Յակովենկո պարտիայի ժամանակ: Հունգարացի գրոսմայստերը հրավիրեց մրցավարին և պահանջեց արձանագրել ոչ-ոքի, քանի որ տեղի է ունեցել քայլերի եռակի կրկնություն, իսկ ինքն արագ դուրս եկավ խաղասրահից: Մրցավարը ստուգեց դիրքը, և պարզվեց, որ ոչ մի կրկնություն էլ չի եղել, և Լեկոյին, ըստ գործող կանոնների, տուգանեցին` մրցակցի ժամանակին ավելացնելով երեք րոպե: Հետագայում պարզվեց, թե ինչու էր Լեկոն դիմել այդ քայլին: Նա ծիծաղելով բացատրեց, որ իրեն ստիպել էր բնական կարիքը: «Ես գիտեի, որ խաղատախտակին հավասար դիրք է, և որոշեցի դիմել այդ խորամանկությանը»,- բացատրեց սովորաբար զուսպ և հավասարակշռված Լեկոն:
Ահա թե ում հետ են հանդիպելու հայ շախմատիստները վերջին տուրերում.
11-րդ տուր (օգոստոսի 21)
ՀԱԿՈԲՅԱՆ-ԱՐՈՆՅԱՆ
12-րդ տուր (օգոստոսի 22)
ԼԵԿՈ-ԱՐՈՆՅԱՆ
ԻՆԱՐԿԻԵՎ-ՀԱԿՈԲՅԱՆ
13-րդ տուր (օգոստոսի 23)
ԱՐՈՆՅԱՆ-ԻՆԱՐԿԻԵՎ
ՀԱԿՈԲՅԱՆ-ԻՎԱՆՉՈՒԿ
Արտաշես ԹԱԴԵՎՈՍՅԱՆ

ՋԵՐՄՈՒԿԻ ՇԱԽՄԱՏԱՅԻՆ ՄՐՑԱՇԱՐՈՒՄ
Ջերմուկում հասարակածն է հատել ՖԻԴԵ-ի «Մեծ մրցանակի» խաղարկության 5-րդ մրցաշարը: Քսան շախմատիստները պարտավոր են մասնակցել մրցաշարերից չորսին. յուրաքանչյուրին մասնակցում է 14 գրոսմայստեր: Ամեն մրցաշարից հետո խաղացողները ստանում են հաշվարկային միավորներ: Ընդհանուր արդյունքում երկու լավագույններն իրավունք կստանան մասնակցելու աշխարհի չեմպիոնի կոչման հավակնորդների մրցաշարին: Ձեր ուշադրությանն ենք ներկայացնում մինչև Ջերմուկի մրցաշարը մասնակիցների վաստակած հաշվարկային միավորները.
Շաբաթ օրը կայացած վեցերորդ խաղափուլում սպիտակներով իր հերթական հաղթանակը տոնեց Լևոն Արոնյանը: Երկարատև պայքարից հետո նա ստիպեց անձնատուր լինել իսրայելցի Բորիս Գելֆանդին: Վլադիմիր Հակոբյանը ոչ-ոքի խաղաց ուկրաինացի Պավել Էլյանովի հետ: Կասիմջանովը սևերով հաղթեց Ինարկիևին, իսկ Ալեքսեևը սպիտակներով` Չեպարինովին: ՈՒշագրավ է, որ 73-րդ քայլից հետո խաղատախտակի վրա, արքաներից բացի, մնացել էին սպիտակների մեկական ձի և փիղ. սա տեսականորեն հաղթած դիրք է, սակայն, ի զարմանս բոլորի, բուլղարացին դեռ 16 քայլ էլ խաղաց` ստուգելով մրցակցի փղով ու ձիով մատ հայտարարելու կարողությունը: Այս խաղափուլում ոչ-ոքի ավարտվեցին Յակովենկո-Կարյակին, Լեկո-Բաքրո պարտիաները: Զավեշտալի ավարտ ունեցավ Իվանչուկ-Կամսկի հանդիպումը: Կամսկին ուներ բացահայտ հաղթած դիրք, բայց Իվանչուկի պահանջով արձանագրվեց ոչ-ոքի: Բանն այն է, որ շախմատում կա «50 քայլի կանոն». եթե 50 քայլի ընթացքում դիրքը չի փոխվում, այսինքն` չի փոխանակվում ոչ մի ֆիգուր, և զինվորները չեն տեղաշարժվում, ապա արձանագրվում է ոչ-ոքի: ՈՒ թեև Կամսկին փորձեց բողոքել, սակայն մրցավարներն անողոք էին. կանոնները խախտել չի կարելի:
Հաջորդ տուրը չափազանց անհաջող դասավորվեց մեր շախմատիստների համար: Նրանք խաղում էին սևերով և երկուսն էլ տանուլ տվեցին. Արոնյանը զիջեց Էլյանովին, Հակոբյանը` Կարյակինին: Առհասարակ, կիրակի օրվա տուրն ամենաարդյունավետն էր մինչ այդ կայացածների մեջ: Գրանցվեց ընդամենը մեկ ոչ-ոքի` Կասիմջանով-Իվանչուկ պարտիայում: Մյուս պարտիաներում Բաքրոն հաղթեց Յակովենկոյին, Գելֆանդը` Ինարկիևին, Ալեքսեևը` Կամսկուն, Լեկոն` Չեպարինովին:
Երեկ կայացած 8-րդ փուլում մեր երկու գրոսմայստերներն էլ սպիտակ խաղաքարերով խաղաղ դաշն կնքեցին: Արոնյանի ոչ ճիշտ 26-րդ քայլից հետո նրա մրցակից Կարյակինը ստացավ առավելություն, սակայն իր հերթին սխալ թույլ տվեց 27-րդ քայլում, և մի շարք փոխանակումներից հետո մրցակիցները համաձայնեցին ոչ-ոքիի: Սա սպիտակ խաղաքարերով Լևոնի առաջին ոչ-ոքին էր. մինչ այդ նա հաղթել էր իր բոլոր «սպիտակ» պարտիաներում: Հակոբյանն ու Բաքրոն էլ մոտավորապես հավասար դիրքում պարտիան ոչ-ոքի ավարտեցին քայլերի կրկնությամբ: Այս տուրում, առհասարակ, մրցակիցները տրամադրված էին խաղաղասիրաբար. միավորը կիսեցին նաև Ինարկիևն ու Էլյանովը, Ալեքսեևն ու Կասիմջանովը, Չեպարինովն ու Կամսկին, Լեկոն ու Յակովենկոն: Եվ միայն Իվանչուկն առավելության հասավ Գելֆանդի նկատմամբ:
Ութ տուրից հետո առաջատարներն են Լեկոն ու Իվանչուկը` 5,5-ական միավոր: Կասիմջանովն ունի 5 միավոր: Լևոն Արոնյանը ևս երեք շախմատիստի հետ 4,5-ական միավորով բաժանում է 4-7-րդ տեղերը: Հակոբյանը 3 միավորով բաժանում է 11-13-րդ տեղերը:
Այսօր մեր գրոսմայստերները կխաղան սև խաղաքարերով: Արոնյանը կմրցի ֆրանսիացի Էթիեն Բաքրոյի, իսկ Հակոբյանը` ռուսաստանցի Դմիտրի Յակովենկոյի հետ:
Արտաշես ԹԱԴԵՎՈՍՅԱՆ