...թե Երևանի բժշկական համալսարանի իրանցի ուսանողների շրջանում լուրջ դժգոհություն է հասունանում այն կապակցությամբ, որ ԻԻՀ կառավարությունը հրաժարվում է չեղյալ հայտարարել հայկական մայր բուհի դիպլոմների անվավերության մասին որոշումը։ Չի բացառվում, որ այս դժգոհությունը վերաճի լուրջ բողոքների։ Ասում են նաև, թե սույն որոշումը հետևանք է այն բանի, որ իրանցի ուսանողները Երևանում ցույցեր են կազմակերպել` ի պաշտպանություն իրենց երկրի ընդդիմության և բռնությունների դեմ բողոքների։

...թե Դմիտրի Մեդվեդևի ենթադրվող այցը Հայաստան կարող է տեղի ունենալ Թուրքիա նրա ուղևորությունից անմիջապես հետո, այսինքն` մայիսի կեսերին։ Հնարավոր է անգամ առանց Մոսկվա վերադառնալու։ Դա, ինչպես նաև կոնկրետ ժամկետներում Հայաստան այցելելու` Սերժ Սարգսյանի թախանձագին առաջարկությունը, պայմանավորված են նրանով, որ հայ քաղաքական շրջանակներին հայտնի է դարձել, թե Անկարա կատարելիք այցի ժամանակ Ռուսաստանի նախագահը հանդես է գալու ղարաբաղյան հարցի կարգավորմանն առնչվող մի շարք հայտարարություններով։ Մասնավորապես, ամենայն հավանականությամբ, հայտարարություն կարվի հայկական զորքերի շուտափույթ դուրսբերման անհրաժեշտության և տարածքային ամբողջականության մասին։ Թեև այս հանգամանքը վաղուց արդեն ռուսները չեն թաքցնում հայկական վերնախավի հետ մասնավոր զրույցներում և ընդգծում են, որ նման հայտարարություններին պետք չէ ցավագին վերաբերվել, սակայն հայ քաղաքական գործիչներից ոչ ոք պատրաստ չէր ստանձնելու փաստաբանի անշնորհակալ դերը և հանգստացնելու հայ բնակչությանը։ Համապատասխանաբար, որոշվել է, որ Մեդվեդևի Հայաստան կատարելիք չպլանավորված այցը կարող է նվազեցնել նրա ասածի բացասական արձագանքը Հայաստանում և մեղմել հնարավոր հակառուսական տրամադրությունները։

...թե Վաշինգտոնի ու Մոսկվայի միջև «աշխատանքի բաժանում» է տեղի ունեցել Հարավային Կովկասի հիմնախնդիրների առնչությամբ։ Խոսքն ԱՄՆ-ի և Ռուսաստանի միջև դիվանագիտական գործառույթների բաշխման մասին է։ Վաշինգտոնն իր հովանու տակ է առել ցյուրիխյան գործընթացը, իսկ Մոսկվան կոչված է ակտիվացնելու ԵԱՀԿ Մինսկի խմբի աշխատանքը և կողմերի վրա իր ազդեցությունն օգտագործել հարցերի «խաղաղ կարգավորման» համար։ Ընդ որում, ռուսական կողմի կարծիքով, կատարյալ տարբերակ կլիներ այն, եթե այդ երկու գործընթացները զուգահեռաբար զարգանային։ Ռուս փորձագետները կարծում են, որ ղարաբաղյան կարգավորումը կարող է Կրեմլի համար «ծանր բեռ» դառնալ, իսկ գործընկերներին ու բարեկամներին կորցնելը` չափազանց հեշտ։ Ասում են նաև, թե «խորամանկ ամերիկացիները» նորից կանխավ ձախողված ոլորտը ռուսների վիզն են գցել, իսկ վերջիններիս ոչինչ չի մնում անելու, քան նույն սկզբունքով ջանքեր գործադրել ցյուրիխյան արձանագրությունները ձախողելու ուղղությամբ։

...թե խորհրդարանի խոսնակ Հովիկ Աբրահամյանը, ով երկու դարպասի վրա խաղալու անուրանալի տաղանդով է օժտված ու արդեն տևական ժամանակ գնդակը մե՛կ գործող նախագահ Սերժ Սարգսյանի դաշտում է խաղարկում, մե՛կ էքսնախագահ Ռոբերտ Քոչարյանի, իրականում անհատական խաղի մեծ սիրահար է։ Ասում են նաև, թե ներկա ու նախկին նախագահները հավասարապես դժգոհ են Հովհաննես Արգամիչի դաշտից դաշտ մանևրելու խորամանկ «տրյուկներից», ու երկուսն էլ հարցը «ռեբրոմ» են դրել` պահանջելով մեկ անգամ և ընդմիշտ հստակեցնել, թե ո՛ւմ թիմից է խաղում։ Ասում են` Աբրահամյանն այժմ լուրջ մտորումների մեջ է։

թե վարչապետ դառնալու, իսկ հետո նաև նախագահի աթոռը «իրենով անելու» մարմաջն այնքան է կուրացրել Ռոբերտ Քոչարյանին, որ նա վերջնականապես կորցրել է իրականության զգացողությունն ու «վաբանկ» գնալու հուսահատ որոշում կայացրել։ Իր համախոհների «լղարիկ» ջոկատով էքսնախագահն իշխանությունը «չորով» վերցնելու մինիմում և մաքսիմում ծրագրեր է մտմտում, որոնց բովանդակությունն առայժմ չենք բացահայտում` ոչնչից ինչ-որ բան չսարքելու համար։ Ի դեպ, Քոչարյանի մինիմում ծրագրի բաղկացուցիչներից մեկն էլ հենց դա է` տարբեր ճանապարհներով «սլիվներ» խցկել տպագիր մամուլ` հասարակական կարծիք ձևավորելու համար, թե հանրապետությունում եղանակ ստեղծող քաղաքական ու բիզնես-դաշտն իր բռան մեջ է, և ցանկացած պահի գործող նախագահի հետ կարող է խոսել վերջնագրերի լեզվով։ Ասում են նաև, թե արտաքուստ Քոչարյանի «ասեղը թելող» «բարի մուլատները» կուլիսներում նյութվող մինիմում և մաքսիմում ծրագրերի մասին արդեն հասցրել են տեղյակ պահել Սերժ Սարգսյանին` շարժելով վերջինիս դառը քմծիծաղը։